ലോകം സാമ്പത്തിക മാന്ദ്യത്തിലേക്ക്; മുന്നറിയിപ്പുമായി ലോക ബാങ്ക്
വാഷിങ്ടണ്‍: ലോകം സാമ്പത്തിക മാന്ദ്യത്തിലേക്ക് നിങ്ങുകയാണെന്ന മുന്നറിയിപ്പുമായി ലോക ബാങ്ക്.
ഭക്ഷ്യ വസ്തുക്കള്‍ക്കും ഇന്ധനത്തിനും പുറമെ വളത്തിനും വില കുതിച്ചു കയറുന്നത് ആഗോള മാന്ദ്യത്തിന് കാരണമാകുമെന്ന് ലോക ബാങ്ക് മേധാവി ഡേവിഡ് മാല്‍പാസ് പറഞ്ഞു. വികസ്വര രാജ്യങ്ങളെയാകും മാന്ദ്യം ഏറെ ബാധിക്കുകയെന്നും അദ്ദേഹം വ്യക്തമാക്കി.
റഷ്യയുടെ ഉക്രെയ്ന്‍ അധിനിവേശം സാമ്പത്തിക പ്രതിസന്ധി വര്‍ധിപ്പിച്ചെന്നാണ് ലോക ബാങ്കിന്റെ വിലയിരുത്തല്‍. ചൈനയില്‍ ഇപ്പോഴും തുടരുന്ന കോവിഡ് ലോക്ഡൗണും സമ്പദ് വ്യവസ്ഥയെ മന്ദഗതിയിലാക്കുന്നുണ്ടെന്നും ഡേവിഡ് മാല്‍പാസ് പറഞ്ഞു.
കഴിഞ്ഞ മാസം ലോക ബാങ്ക് ഈ വര്‍ഷത്തെ ആഗോള സാമ്പത്തിക വളര്‍ച്ചാ പ്രവചനം 3.2 ശതമാനമായി കുറച്ചിരുന്നു.
ജര്‍മ്മനി ഉള്‍പ്പെടെ പല യൂറോപ്യന്‍ രാജ്യങ്ങളിലും ഊര്‍ജ പ്രതിസന്ധി രൂക്ഷമാണ്. ഇന്ധനത്തിന് വില ഉയരുന്നത് വലിയ സാമ്പത്തിക രംഗങ്ങളെപ്പോലും സമ്മര്‍ദത്തിലാക്കിയിട്ടുണ്ട്. ഭക്ഷണത്തിന്റേയും ഊര്‍ജത്തിന്റേയും ഇന്ധനത്തിന്റേയും ക്ഷാമം വികസ്വര രാജ്യങ്ങളേയും വലയ്ക്കുന്നുണ്ടെന്ന് ലോക ബാങ്ക് വിലയിരുത്തി.
കോവിഡ് സൃഷ്ടിച്ച പ്രതിസന്ധിയില്‍ നിന്നുള്ള തിരിച്ചുവരവ് തൃപ്തികരമല്ലെന്നാണ് ലോകബാങ്കിന് മുന്നിലുള്ള കണക്കുകള്‍ സൂചിപ്പിക്കുന്നത്. ലോക്ഡൗണുകള്‍ ചൈന ഉള്‍പ്പെടെയുള്ള രാജ്യങ്ങളിലെ സമ്പദ് വ്യവസ്ഥയെ മാന്ദ്യത്തിലേക്ക് തള്ളിവിട്ടു.
ഇന്ധനത്തിനായി റഷ്യയെ പൂര്‍ണമായും ആശ്രയിച്ച യൂറോപ്പ്, യുദ്ധവും അതേ തുടര്‍ന്നുള്ള ഉപരോധവും മൂലം സമ്മര്‍ദത്തിലാണെന്നും ഡേവിഡ് മാല്‍പാസ് പറഞ്ഞു.
